Првиот чекор на Рико, во елитниот автомобилистички свет

Нашиот најперспективен возач и шампион на Македонија и во Отвореното првенство на Србија за сезоната 2019, ќе учествува на престижната и гламурозна трка на издржливост, „Галф 12“, која ќе се вози во Абу Даби на 13/14 декември.
 
„За мене е огромна чест и задоволство да учествувам на деветтото издание на реномираната и атрактивна автомобилистичка трка “Gulf12”. Ќе возам за мојот нов тим, GDL Racing со кој следната сезона ќе настапувам во Porsche Carrera Cup GT3 2020.“
 
За Ристо Вуков, 12-те часа што ќе ги помине на трката во Персискиот залив ќе бидат негово огнено крштевање со новото Порше Карера 911, со кое ќе ги брани боите на нашата земја на најмалку 7 трки следната сезона.
 
 
„Ова ќе ми биде првото запознавање во реални услови, со новиот автомобил со кој се надевам ќе и донесам многу радости на Македонија на меѓународната сцена. На моја среќа, меѓу 37-те возачи кои ќе настапат на “Gulf12”, ќе ја имам таа привилегија да се натпреварувам против седумкратниот шампион во Moto GP, Валентино Роси кој ќе вози Ферари.“
 
Арапските земји се обидуваат константно да го собираат светскиот автомобилистички крем, се почесто создаваат пандани на големите и респектабилни настани кои се случуваат во Европа. Ова ќе биде одлична можност за промоција на квалитетите на Ристо Вуков Рико и на Македонија, меѓу светската автомобилистичка елита.